Kiira Stäärens Doochter - Kira Sternentochter

Iirhunerte lung hääwe da saratoona önj e doolgrün ma da hålistiine freetlik laawed. Ja stöön uner di wüsterädj foon trii huugepreesterine än hääwe Maaʼn; e Mam foont Hiile, än harn jarste saan, di Norderstäär Tuul feriird. Ouers matiinjs ferkünit deer en tiiken foon e hamel, dåt Kiira Stäärens Doochter tuläid wårde schölj, am har följk döör grut gefåår tu fäären. Maadra än Tiirokiil, da ütkiisede ålerne, kaame bål ordi önj e knipe: En preesterin foon di tweede rång, wat måål eefter måcht as, wal jü wüf weese, wat Kiiran tuläit. Jü ferseecht Tiirokiilʼn tu ferfäären, tråchtit Maadran eeftert laawen. Bloot ma ouernatörlik heelp luket et, jü intriige äämtuleeden, jü tukaamen mam tu schöölen. Seekstäin iir lääder ouernamt Kiira dåt swåår åmt. Önjtwasche heet ham dåt dool stark feranerd: Weenhüdede tiinoona san inrüked; ja sloue da hilie stiine önjstöög, unerwööle dåt lönj, betrüwe dåt följk, wat heer sunt üülje tide booget. Da saratoona wårde twüngen, döör en unerjardschen gung tu flüchten, aw e janereege e bärje boogfååst tu wården. Ouers Kiira mäi ån foon da fråmde lise. Jü namtʼn as brouder önj än wal uk heewe, dåtʼr makamt, wanʼs üttiie. Jü wiitj nooch: Taamu as di saan foon jü preesterin, wat jütids har mam oufmjardie wälj. As har lünsche ploone forʼn däi kömen, wörd jü trouluus wüset ferbånd än heet har wat lääder ma en tiinoona-föörst befraid. Nü walʼs wrååk naame. Koon Kiira Taamun troue? Schalʼt jü jung önjfäärerin luke, har följk tu schöölen, önj e fråmde harn wäi tu finen?